വെള്ളമുണ്ട: ലാപ്ടോപ് കിട്ടിയിട്ടും ഉപയോഗിക്കാനാവാതെ ആദിവാസി വിദ്യാര്‍ഥികള്‍. പൊതുവിദ്യാദ്യാസ വകുപ്പിെന്‍റ വിദ്യാകിരണം പദ്ധതി പ്രകാരം ലഭിച്ച ലാപ്ടോപ്പുകളാണ് കൃത്യമായി ഉപയോഗിക്കാന്‍ കഴിയാതെ ആദിവാസി വിദ്യാര്‍ഥികള്‍ പ്രയാസപ്പെടുന്നത്.
ഓണ്‍ലൈന്‍ ക്ലാസുകള്‍ കേള്‍ക്കുന്നതിനുവേണ്ടിയാണ് പ്രധാനമായും ലാപ്ടോപ്പുകള്‍ നല്‍കാന്‍ സര്‍ക്കാര്‍ തീരുമാനിച്ചത്. എന്നാല്‍, നെറ്റ് സംവിധാനമോ ഉപയോഗിക്കാനുള്ള പ്രാവീണ്യമോ ഇല്ലാത്തതിനാല്‍ ബഹുഭൂരിപക്ഷത്തിനും ഉപയോഗപ്പെടുത്താന്‍ കഴിയുന്നില്ലെന്ന് പരാതിയുണ്ട്.
ലാപ്ടോപ്പുകള്‍ നല്‍കുന്നതിനൊപ്പം ഇത് ഉപയോഗിക്കാനുള്ള പരിശീലനംകൂടി കൃത്യമായി നല്‍കണമെന്നാണ് ആവശ്യം. ജില്ലയില്‍ 17,000ത്തിലധികം ലാപ്ടോപ്പുകളാണ് വിതരണം ചെയ്യുന്നത്. ആദിവാസി വിഭാഗത്തിലെ ഏറ്റവും പിന്നാക്കം നില്‍ക്കുന്ന പണിയ വിഭാഗത്തിലെ വിദ്യാര്‍ഥികളാണ് ലാപ്ടോപ് കൈയില്‍ കിട്ടിയിട്ടും ഉപയോഗിക്കാനറിയാതെ വട്ടം കറങ്ങുന്നത്.
കോവിഡ് നിയന്ത്രണങ്ങള്‍ക്ക് ശേഷം വിദ്യാലയങ്ങള്‍ തുറന്നുപ്രവര്‍ത്തിക്കാന്‍ തുടങ്ങിയെങ്കിലും ഗോത്രവര്‍ഗ വിദ്യാര്‍ഥികളില്‍ നല്ലൊരു ശതമാനവും ഇതുവരെ എത്തിയിട്ടില്ല. കോളനികളോട് ചേര്‍ന്ന പൊതുപഠന കേന്ദ്രങ്ങളും ഓണ്‍ലൈന്‍ ക്ലാസുകളുമാണ് നിലവിലെ ഇവരുടെ ആശ്രയം.
ലാപ്ടോപ് ലഭിച്ച വിദ്യാര്‍ഥികള്‍ ഓരോരുത്തരും നെറ്റ് സംവിധാനം വീടുകളിലെ മൊബൈലുകളില്‍നിന്ന് ലഭ്യമാക്കണമെന്നാണ് നിര്‍ദേശം. എന്നാല്‍, അത്തരത്തിലുള്ള സംവിധാനം ഇല്ലാത്തവരോ, അവ കണക്‌ട് ചെയ്ത് ഉപയോഗിക്കാനറിയാത്തവരോ ആണ് ബഹുഭൂരിപക്ഷവും. കോളനികളോട് ചേര്‍ന്ന പൊതു ഇടങ്ങളില്‍ വൈഫൈ സംവിധാനം ഒരുക്കുകയും കൃത്യമായ പരിശീലനം ഏര്‍പ്പെടുത്തുകയും ചെയ്താല്‍ മാത്രമേ കോടികള്‍ മുടക്കി നടപ്പാക്കിയ പദ്ധതി ഉപയോഗപ്രദമാവുകയുള്ളൂ.
0 Comments