ചെന്നൈ :നാഗർകോവിലിൽ കാണാതായ കുട്ടിയുടെ മൃതദേഹം അയൽവാസിയുടെ അലമാരയിൽ നിന്നും കണ്ടെത്തി. കുടിയപട്ടണം സ്വദേശികളായ ജോൺ റിച്ചാർഡ്- സഹായസിൽജ ദമ്പതികളുടെ മകൻ ജോഗൻ റിഷിയാണ് മരിച്ചത്. സംഭവത്തിൽ അയൽവാസിയായ യുവതിയെ പോലീസ് കസ്റ്റഡിയിൽ എടുത്തു.
കഴിഞ്ഞ ദിവസമായിരുന്നു നാലുവയസ്സുകാരനായ കുട്ടിയെ കാണാതായത്. വീടിന് മുന്നിൽ കളിച്ചുകൊണ്ടിരുന്നതിനിടെയായിരുന്നു തിരോധാനം. ആദ്യം ബന്ധുവീടുകളിൽ ഉണ്ടെന്നായിരുന്നു ധരിച്ചിരുന്നത്. എന്നാൽ ഏറെ വൈകിയും കുട്ടിയെ കാണാതെവന്നതോടെ ബന്ധുവീടുകളിൽ അന്വേഷിച്ചപ്പോഴാണ് അവിടെയെത്തിയില്ലെന്ന് അറിഞ്ഞത്. തുടർന്ന് സഹായസിൽജ പോലീസിൽ പരാതി നൽകുകയായിരുന്നു.
പരാതിയിൽ പോലീസ് കേസ് എടുത്ത് അന്വേഷണം ആരംഭിച്ചു. ഇതിനിടെയാണ് അയൽവാസിയായ ഫാത്തിമയുടെ പെരുമാറ്റത്തിൽ പ്രദേശവാസികളിൽ ചിലർക്ക് സംശയം ഉണ്ടായത്. തുടർന്ന് നാട്ടുകാർ സംഘടിച്ചെത്തി വീട് പരിശോധിക്കുകയായിരുന്നു. അപ്പോഴാണ് അലമാരയ്‌ക്കുള്ളിൽ കുട്ടിയെ കണ്ടത്.
വായ്മൂടികെട്ടിയ നിലയിലായിരുന്നു കുട്ടി. ഉടനെ ആശുപത്രിയിൽ എത്തിച്ചെങ്കിലും കുട്ടി മരിച്ചിരുന്നു. കുട്ടിയെ ഫാത്തിമ തട്ടിക്കൊണ്ടുപോയത് എന്തിനെന്ന് വ്യക്തമല്ല. കസ്റ്റഡിയിൽ എടുത്ത ഫാത്തിമയെ ചോദ്യം ചെയ്തുവരികയാണ്.
0 Comments