മഞ്ചേരി: നഗരത്തിന്‍റെ ഹൃദയഭാഗത്ത് പ്രവര്‍ത്തിക്കുന്ന പഴയ ബസ് സ്റ്റാന്‍റ് കെട്ടിടം പൊളിക്കല്‍ ആരംഭിച്ചു. മുകള്‍നിലയിലെ റൂമുകളുടെ ഷട്ടറുകള്‍ പൊളിച്ചു തുടങ്ങി. കെട്ടിടം പൊളിക്കുന്പോഴുണ്ടാകുന്ന പൊടിപടലങ്ങള്‍ നിയന്ത്രിക്കുന്നതിനും മറ്റുമായി നെറ്റ് കെട്ടിയിട്ടുണ്ട്. ബസുകള്‍ നിര്‍ത്തിയിടുന്ന ട്രാക്കിന്‍റെ ഭാഗമാണ് ആദ്യം പൊളിച്ചുമാറ്റുന്നത്. ഷട്ടറുകള്‍ നീക്കം ചെയ്ത ശേഷമാണ് കെട്ടിടം പൊളിക്കുന്നതിലേക്ക് കടക്കുക.
സ്റ്റാന്‍റിലേക്ക് ബസുകള്‍ കയറി ഇറങ്ങുന്നത് തടയാന്‍ പോലീസിനും ബസ് ഉടമകള്‍ക്കും നിര്‍ദേശം നല്‍കിയിട്ടുണ്ട്. കെട്ടിടത്തിലേക്കുള്ള വൈദ്യുതി ബന്ധവും വിച്ഛേദിക്കും. രണ്ട് ഭാഗത്തും വാഹനങ്ങള്‍ കയറുന്നതും ബാരിക്കേഡ് ഉപയോഗിച്ച്‌ തടയും. സ്റ്റാന്‍ഡിനകത്തെ പാര്‍ക്കിങ്ങും ഒഴിവാക്കും.
കടമുറികള്‍ ഒഴിയാന്‍ വ്യാപാരികള്‍ക്ക് നേരത്തെ നോട്ടീസ് നല്‍കിയിരുന്നു. നിലവില്‍ പൊളിക്കുന്ന ഭാഗത്ത് എട്ട് വ്യാപാര സ്ഥാപനങ്ങളാണ് ഉള്ളത്. ഇവര്‍ക്ക് അടുത്ത് തന്നെ ഷെഡ് കെട്ടി കച്ചവടം നടത്താനുള്ള സൗകര്യം ഒരുക്കും. ഇതിനായി ഹോളോബ്രിക്സ് ഇന്നലെ എത്തിച്ചിട്ടുണ്ട്. 15 ലക്ഷം രൂപക്കാണ് പൊളിക്കാന്‍ ടെന്‍ഡര്‍ നല്‍കിയിട്ടുള്ളത്.
0 Comments