അബുദാബി : യു.എ.ഇയിലെ സന്ദര്‍ശക വിസ ഉടമകള്‍ക്ക് രാജ്യത്തിനകത്ത് നിന്ന് വിസ നീട്ടാനുള്ള സൗകര്യം നിര്‍ത്തലാക്കുന്ന പുതിയ നിയമങ്ങള്‍ ചൊവ്വാഴ്ച പ്രാബല്യത്തില്‍ വന്നു. നിലവില്‍, സന്ദര്‍ശകര്‍ വിസയുടെ കാലാവധി കഴിഞ്ഞാല്‍ രാജ്യം വിടണം.
_നിലവില്‍ രാജ്യത്ത് സന്ദര്‍ശനം നടത്തുന്നവരെ ഇത് എങ്ങനെ ബാധിക്കും. വിശദാംശങ്ങളറിയാം._
'കോവിഡ് മഹാമാരി സമയത്താണ് യു.എ.ഇ സന്ദര്‍ശകര്‍ക്ക് രാജ്യത്തിനകത്ത് നിന്ന് വിസ നീട്ടാനുള്ള ഓപ്ഷന്‍ ആദ്യമായി അവതരിപ്പിച്ചതെന്ന് സ്മാര്‍ട്ട് ട്രാവല്‍സിലെ അഫി അഹമ്മദ് പറഞ്ഞു. 'വിസ നീട്ടാനോ രാജ്യത്ത് നിന്ന് അവരുടെ പദവി മാറ്റാനോ ഉള്ള ഓപ്ഷന്‍ അതിന് മുമ്പ് ലഭ്യമായിരുന്നില്ല.'
കോവിഡ് സമയത്ത്, യാത്ര ബുദ്ധിമുട്ടായപ്പോള്‍, മാനുഷിക ആശങ്കകള്‍ കണക്കിലെടുത്ത് യു.എ.ഇ ഈ മാറ്റം വരുത്തി. രാജ്യത്ത് ജോലി ഉറപ്പിച്ചവരോ ഒരു റെസിഡന്‍സി വിസ തിരഞ്ഞെടുക്കുന്നവരോ ആയ സന്ദര്‍ശകരും സ്റ്റാറ്റസ് മാറ്റം ഫലപ്രദമാകുന്നതിന് രാജ്യം വിട്ട് വീണ്ടും പ്രവേശിക്കണം.
ഡിസംബര്‍ 13 ചൊവ്വാഴ്ച മുതല്‍ നിയമങ്ങളില്‍ മാറ്റം നിലവില്‍ വന്നു. ദുബായ് ഒഴികെയുള്ള എല്ലാ എമിറേറ്റുകളിലും ഭേദഗതികള്‍ നിലവില്‍ വന്നതായി ട്രാവല്‍ ഏജന്റുമാര്‍ ചൂണ്ടിക്കാട്ടി. 'ഞങ്ങള്‍ ചൊവ്വാഴ്ച ഒരു ദുബായ് സന്ദര്‍ശന വിസ നീട്ടാനുള്ള അപേക്ഷ നല്‍കിയതായും അത് അംഗീകരിച്ചതായും പ്ലൂട്ടോ ട്രാവല്‍സില്‍നിന്നുള്ള ഭാരത് ഐദസാനി പറഞ്ഞു. എന്നാല്‍ അബുദാബി, ഷാര്‍ജ ആസ്ഥാനമായുള്ള രണ്ട് വിസകള്‍ക്കായി ഞങ്ങള്‍ ഇത് പരീക്ഷിച്ചു, പക്ഷേ നിരസിക്കപ്പെട്ടു.'
അപേക്ഷിക്കാന്‍ ശ്രമിക്കുമ്പോള്‍ എറര്‍ കാണിക്കുന്നതിനാല്‍ വിസിറ്റ് വിസ നീട്ടാനുള്ള പ്രോസസിംഗ് ചെയ്യാന്‍ തങ്ങള്‍ക്ക് കഴിയുന്നില്ലെന്ന് ചില ദുബായ് ഏജന്റുമാര്‍ പറയുന്നു. മറ്റുള്ളവര്‍ തങ്ങളുടെ വിസ നീട്ടല്‍ അപേക്ഷ നിരസിച്ചതായി റിപ്പോര്‍ട്ട് ചെയ്തു.
'രാജ്യത്ത് കൂടുതല്‍ കാലം താമസിക്കാന്‍ ആഗ്രഹിക്കുന്നവര്‍ക്ക് നിരവധി റെസിഡന്‍സി വിസ ഓപ്ഷനുകള്‍ ലഭ്യമാണ്,' അഫ്താബ് ടൂര്‍സില്‍ നിന്നുള്ള അബ്ദുള്‍ റഹീം പറഞ്ഞു. 'സാധാരണ 2 വര്‍ഷത്തെ വിസകള്‍, ഫ്രീലാന്‍സ് പെര്‍മിറ്റുകള്‍, വര്‍ക്ക് ഫ്രം ഹോം വിസകള്‍ എന്നിവയും മറ്റ് പലതും ആളുകള്‍ക്ക് തിരഞ്ഞെടുക്കാം. അതിനാല്‍, ആളുകള്‍ക്ക് അവരുടെ സന്ദര്‍ശന വിസകള്‍ നീട്ടേണ്ടത് ശരിക്കും ആവശ്യമില്ല.
മറ്റ് ട്രാവല്‍ ഏജന്റുമാരും ഇത് സമ്മതിക്കുന്നു. 'ചിലര്‍ വിസിറ്റ് വിസയില്‍ ഒരു വര്‍ഷംപോലും രാജ്യത്ത് തങ്ങുന്ന കേസുകള്‍ കണ്ടിട്ടുണ്ട്,' ഭാരത് പറഞ്ഞു. 'സര്‍ക്കാര്‍ യഥാര്‍ഥത്തില്‍ അത് പ്രോത്സാഹിപ്പിക്കാന്‍ ആഗ്രഹിക്കുന്നില്ല. വിനോദസഞ്ചാര ആവശ്യങ്ങള്‍ക്കായി വരുന്നവര്‍ അപൂര്‍വമായി മാത്രമേ അനിശ്ചിതകാലത്തേക്ക് ഇതുപോലെ വിസ നീട്ടാറുള്ളൂ. മറ്റാവശ്യങ്ങള്‍ക്കായി രാജ്യത്ത് കഴിയുന്നവര്‍ക്ക്, അവര്‍ക്ക് തിരഞ്ഞെടുക്കാന്‍ നിരവധി വിസകളുണ്ട്. അതിനാല്‍, എന്തുകൊണ്ടാണ് മാറ്റങ്ങള്‍ വരുത്തിയതെന്ന് വ്യക്തമാണ്.
ഫ്രീലാന്‍സ് വിസ പെര്‍മിറ്റുകള്‍ ആളുകളെ രാജ്യത്ത് താമസിക്കാനും ജോലി അന്വേഷിക്കാനും അല്ലെങ്കില്‍ ഫ്രീലാന്‍സ് അടിസ്ഥാനത്തില്‍ ജോലി ഏറ്റെടുക്കാനും അനുവദിക്കുന്നുവെന്ന് റെയ്‌ന ടൂര്‍സിലെ കോള്‍ സെന്റര്‍ പ്രതിനിധി വിശദീകരിച്ചു.
_മറ്റ് സാധ്യതകള്‍_
നിലവില്‍, വിസിറ്റ് വിസയില്‍ രാജ്യത്ത് കഴിയുന്നവര്‍ക്ക് നിരവധി ഓപ്ഷനുകള്‍ ലഭ്യമാണ്.
• ദുബായില്‍നിന്നുള്ള വിസ ഉള്ളവര്‍ക്കും ഇനിയൊരു അറിയിപ്പ് ഉണ്ടാകുന്നത് വരെ രാജ്യത്തിനകത്ത് നിന്ന് നീട്ടാം.
• മറ്റേതെങ്കിലും എമിറേറ്റില്‍നിന്ന് വിസിറ്റ് വിസയുള്ളവരും വിസിറ്റ് വിസയില്‍ യു.എ.ഇയില്‍ തുടരാന്‍ ആഗ്രഹിക്കുന്നവരും രാജ്യം വിട്ട് പുതിയ പെര്‍മിറ്റിന് അപേക്ഷിക്കണം.
• വിസിറ്റ് വിസയിലുള്ളവരും സ്റ്റാറ്റസ് മാറ്റാന്‍ ആഗ്രഹിക്കുന്നവരും അവരുടെ വിസക്ക് അപേക്ഷിക്കണം, അംഗീകാരം ലഭിച്ചുകഴിഞ്ഞാല്‍, അവര്‍ രാജ്യത്ത് നിന്ന് പുറത്തുകടന്ന് വീണ്ടും പ്രവേശിക്കണം.
_സംശയങ്ങളും മറുപടിയും_
• പുറത്തുപോകാതെ രാജ്യത്തിനകത്ത്‌നിന്നുള്ള വിസ പുതുക്കല്‍ താല്‍ക്കാലികമായി നിര്‍ത്തിവച്ചതായി എന്റെ ട്രാവല്‍ ഏജന്റ് പറഞ്ഞു. എന്റെ വിസയുടെ കാലാവധി ഇന്ന് അവസാനിക്കും. അപ്പോള്‍ ഞാന്‍ ഇന്ന് രാജ്യം വിടണോ?
വിസിറ്റ് വിസ ദുബായില്‍നിന്നാണോ അല്ലയോ എന്നതിനെ ആശ്രയിച്ചിരിക്കും. ഇത് ദുബായില്‍ നിന്നാണെങ്കില്‍, ഇപ്പോള്‍ തന്നെ അത് നീട്ടാനുള്ള ഓപ്ഷന്‍ നിങ്ങള്‍ക്കുണ്ടായേക്കാം. നിങ്ങളുടെ ട്രാവല്‍ ഏജന്‍സിയുമായി നിങ്ങള്‍ പരിശോധിക്കേണ്ടതുണ്ട്. എന്നിരുന്നാലും, ഇത് മറ്റേതെങ്കിലും എമിറേറ്റില്‍ നിന്നുള്ളതാണെങ്കില്‍, നിങ്ങള്‍ എത്രയും വേഗം രാജ്യം വിടണം.
• എന്റെ യാത്രാ ക്രമീകരണങ്ങള്‍ നടത്താന്‍ എനിക്ക് എത്ര ദിവസത്തെ ഗ്രേസ് പിരീഡ് ഉണ്ട്?
ഇത് നിങ്ങളുടെ വിസ കാലാവധിയെ ആശ്രയിച്ചിരിക്കുന്നു. നിങ്ങള്‍ക്ക് 30 ദിവസത്തെ സന്ദര്‍ശന വിസയുണ്ടെങ്കില്‍, രാജ്യം വിടാന്‍ നിങ്ങള്‍ക്ക് 10 ദിവസത്തെ ഗ്രേസ് പിരീഡ് ഉണ്ട്. പത്തു ദിവസം കഴിഞ്ഞാല്‍ പിഴ കിട്ടിത്തുടങ്ങും. സ്മാര്‍ട്ട് ചാനല്‍ പോര്‍ട്ടല്‍ https://beta.smartservices.icp.gov.ae/echannels/web/client/default.html#/fileValidtiy എന്നതില്‍ നിങ്ങള്‍ക്ക് എത്ര ദിവസത്തെ ഗ്രേസ് പിരീഡ് ബാക്കിയുണ്ടെന്ന് പരിശോധിക്കാം.
• ഈ പുതിയ സംവിധാനം നടപ്പിലാക്കുന്നതിന് മുമ്പാണ് ഞാന്‍ ഈ രാജ്യത്ത് വന്നത്. വിസ പുതുക്കുന്നതിനുള്ള എന്റെ കാര്യത്തെയും ഇത് ബാധിക്കുമോ?
അതെ. പുതിയ നിയമം എല്ലാവര്‍ക്കുമായി ഉടനടി പ്രാബല്യത്തില്‍ വരും.
0 Comments