Flash News

6/recent/ticker-posts

ആഭ്യന്തര ഹജ്ജ് തീർത്ഥാടകർ രണ്ടാം ഗഡു ഫീസ്​ ഞായറാഴ്​ചക്കകം അടക്കണം

Views


ജിദ്ദ: ആഭ്യന്തര ഹജ്ജ്​ തീർഥാടകർ​ രണ്ടാം ഗഡു ഫീസ്​ ജനുവരി​ 29നകം (റജബ്​ ഏഴ്​ ഞായറാഴ്​ച) അടക്കണമെന്ന് ഹജ്ജ്​ ഉംറ മന്ത്രാലയം അറിയിച്ചു. ഈ വർഷം ഹജ്ജിന്​ ബുക് ചെയ്ത് ആദ്യഗഡു അടച്ചവർ രണ്ടാം ഗഡുവായ 40 ശതമാനമാണ് ഇപ്പോൾ അടക്കേണ്ടത്.

ബുക്കിങും ഹജ്ജ് പെർമിറ്റ് ഇഷ്യൂവും ഉറപ്പാക്കുന്നതിന് പൗരന്മാരും താമസക്കാരും മൂന്ന് ഗഡുക്കളായി നിശ്ചിത തീയതികൾക്കകമാണ് ഫീസ് അടക്കേണ്ടത്. ​അല്ലെങ്കിൽ ബുക്കിങ്​ റദ്ദാകുമെന്നും ഓരോ ഫീസ്​ അടവിനും പ്രത്യേകം ഇൻവോയ്‌സ് നൽകുമെന്നും മന്ത്രാലയം സൂചിപ്പിച്ചിരുന്നു.

ആഭ്യന്തര തീർഥാടന ചരിത്രത്തിലാദ്യമായാണ്​ രണ്ട് രീതികളിലൂടെ ഫീസ് അടയ്ക്കാനുള്ള സൗകര്യം മന്ത്രാലയം ഈ വർഷം​ ആരംഭിച്ചത്​. ബുക് ചെയ്ത് സീറ്റ് ഉറപ്പായതായി മെസേജ് ലഭിച്ചാൽ 72 മണിക്കൂറിനുള്ളിൽ ഫീസ് മുഴുവനായി അടക്കുകയും അതിനായി ഒരു ഇൻവോയ്സ് നൽകുകയും ചെയ്യുന്നതാണ്​ ഒരു രീതി. അപ്പോൾ ബുക്കിങ്ങിന്റെ​ സ്​റ്റാറ്റസ്​ ‘സ്ഥിരീകരിച്ചു’ എന്നാകും.

രണ്ടാമത്തെ രീതി മൂന്ന്​ ഗഡുക്കളായി ഫീസ്​ അടക്കാനുള്ള സൗകര്യമാണ്. ഇതനുസരിച്ച്​ ഓൺലൈൻ ലിങ്ക് വഴി ബുക്ക് ചെയ്ത് സീറ്റ് ഉറപ്പായി എന്ന് മെസേജ് ലഭിച്ചാൽ 72 മണിക്കൂറിനുള്ളിൽ ആകെ തുകയുടെ 20 ശതമാനം ആദ്യഗഡു അടക്കണം. രണ്ടാംഗഡു 40 ശതമാനം ജനുവരി 29ന്​​ മുമ്പ്​​ അടക്കണം. മൂന്നാംഗഡു 40 ശതമാനം ഇൗ വർഷം മെയ്​ ഒന്നിനും​ (ശവ്വാൽ പത്തിന്​ മുമ്പ്​) അടച്ചിരിക്കണം.

നിശ്ചിത തീയതികളിൽ ഫീസ്​ അടച്ചാൽ മാത്രമേ ബുക്കിങ്​ ‘സ്ഥിരീകരിക്കപ്പെട്ടു’ എന്ന സ്​റ്റാറ്റസിലാകൂവെന്ന് ഹജ്ജ്​ ഉംറ മന്ത്രാലയം അറിയിച്ചിരുന്നു.



Post a Comment

0 Comments