Flash News

6/recent/ticker-posts

പിതാവിന്‍റെ ക്യാന്‍സര്‍ ചികിത്സയ്ക്കായി 'കുഞ്ഞാറ്റ'യെ വിറ്റു, അസ്നയ്ക്ക് കിടിലന്‍ സമ്മാനവുമായി 'ആഗ്രഹപ്പെട്ടി'

Views
പിതാവിന്‍റെ ക്യാന്‍സര്‍ ചികിത്സയ്ക്കായി 'കുഞ്ഞാറ്റ'യെ വിറ്റു, അസ്നയ്ക്ക് കിടിലന്‍ സമ്മാനവുമായി 'ആഗ്രഹപ്പെട്ടി,



തിരുവനന്തപുരം: ക്യാൻസർ ബാധിതനായ പിതാവിന്‍റെ ചികിത്സക്ക് പണം കണ്ടെത്താന്‍ വേണ്ടി ഓമന മൃഗത്തെ വിറ്റ അഞ്ചാം ക്ലാസുകാരിക്ക് ആഗ്രഹപ്പെട്ടി നല്‍കിയത് കിടിലന്‍ സമ്മാനം. കൂലിപ്പണിക്കാരനായിരുന്ന പിതാവ് മരണപ്പെടുക കൂടി ചെയ്തതോടെ കടുത്ത വിഷാദത്തിലായിരുന്ന പെണ്‍കുട്ടിക്കാണ് സ്കൂളിലെ ആഗ്രഹപ്പെട്ടി ശരിക്കും സമ്മാനപ്പെട്ടിയായത്. പാലോട് ഇടിഞ്ഞാർ ട്രൈബൽ ഹൈസ്കൂളിലെ അഞ്ചാം ക്ലാസുകാരിയും ഇടിഞ്ഞാർ മങ്കയം സ്വദേശി ഷിബുവിന്റെ മകളുമായ അസ്‌ന സ്കൂളിലെ  ആഗ്രഹപ്പെട്ടിയില്‍ നിക്ഷേപിച്ച കുറിപ്പില്‍ എഴുതിയിരുന്നത് ഇങ്ങനെയായിരുന്നു. 



' എന്റെ കൂട്ടുകാരിയായിരുന്നു കുഞ്ഞാറ്റ ആട്, എനിക്ക് ഏറ്റവും പ്രിയപ്പെട്ടവൾ. എന്നാൽ വാപ്പയുടെ ചികിത്സക്ക് കാശ് തികയാതെ വന്നപ്പോൾ ഉമ്മ അവളെ വിറ്റു. കുഞ്ഞാറ്റയെ വിറ്റതോടെ വലിയ സങ്കടത്തിലാണ് ഞാൻ. എനിക്ക് ഒരു ആടിനെ വാങ്ങി നൽകാമോ'



സ്കൂളിൽ പഠിക്കുന്ന ഭൂരിഭാഗം കുട്ടികളും ആദിവാസി ഊരുകളിൽ നിന്ന് എത്തുന്നവരാണ്. പരിമിതികളിൽ നിന്ന് ജീവിതം കെട്ടിപ്പടുക്കുന്ന ഇവർക്ക് സ്കൂളിലെ ആഗ്രഹപ്പെട്ടി ആഗ്രഹങ്ങൾ സാധിച്ചു തരുന്ന മാജിക് പെട്ടിയാണ്. കുട്ടികളുടെ കുടുംബ സാഹചര്യങ്ങളും പരിമിതികളും നല്ലപോലെ അറിയുന്ന അധ്യാപകർ കൈത്താങ്ങ് കൂട്ടായ്മയുടെ സഹായത്തോടെയാണ് സ്കൂളിൽ ഒരു പെട്ടി സ്ഥാപിച്ചത്. കുട്ടികൾ എഴുതിയിടുന്ന കുഞ്ഞു ആഗ്രഹൾ അധ്യാപകരും കൂട്ടായ്മയും ചേർന്ന് സാധിച്ചു നൽകും. അങ്ങനെയാണ് ഈ പെട്ടിക്ക് ആഗ്രഹപ്പെട്ടിയെന്ന് പേരിട്ടത്. പലപ്പോഴും ഈ പെട്ടി തുറക്കുമ്പോൾ സന്തോഷിപ്പിക്കുന്നതും സങ്കടപ്പെടുത്തുന്നതുമായ പല പല ആഗ്രഹങ്ങൾ കുട്ടികളുടെ ഭാഗത്തുനിന്ന് തങ്ങൾക്ക് ലഭിക്കാറുണ്ടെന്ന് കൂട്ടായ്മയിലുള്ളവർ പറയുന്നു. ഇതിൽ തങ്ങളെക്കൊണ്ട് സാധിക്കുന്ന ആഗ്രഹങ്ങൾ നിറ മനസ്സോടെ കൂട്ടായ്മ നിറവേറ്റി കൊടുക്കാറുണ്ട്. 



അത്തരത്തിൽ കഴിഞ്ഞ ദിവസം പെട്ടി തുറന്നപ്പോഴാണ് അഞ്ചാം ക്ലാസുകാരി അസ്നയുടെ ആഗ്രഹം അധ്യാപകർ കണ്ടത്. കുട്ടിയുടെ വരികൾ കത്ത് വായിച്ച് ഏതൊരാളുടെയും മനസ്സിനെ തൊടുന്നതായിരുന്നു. ഇതോടെയാണ് കുട്ടിയുടെ ആഗ്രഹം സാധിച്ചു കൊടുക്കാൻ തന്നെ അധ്യാപകർ തീരുമാനിച്ചത്. വാപ്പയുടെ വിയോഗം നന്നായി അലട്ടിയിരുന്ന അസ്നയെ പതിയെ സന്തോഷങ്ങളിലേക്ക് തിരിച്ചു കൊണ്ടു വരാൻ വേണ്ടി കൈത്താങ്ങ് കൂട്ടായ്മയും അധ്യാപകരും പുതിയ ഒരു ആടിനെ വാങ്ങി നൽകുകയായിരുന്നു. 




 *കുഞ്ഞാറ്റക്ക് പകരമാവില്ലെന്നറിയാം, പക്ഷേ...; 'അസ്നമോളുടെ കത്ത് അപ്പൂപ്പനും വായിച്ചു'; ശിവൻകുട്ടിയുടെ കുറിപ്പ്* 


തിരുവനന്തപുരം: ഒരു കൊച്ച് കുട്ടിയുടെ കുഞ്ഞ് ആഗ്രഹത്തിനായി സഫലമാക്കുന്നതിനായി ഒരു സ്കൂള്‍ മുഴവൻ ഒരുമിച്ചതില്‍ സന്തോഷം അറിയിച്ച് വിദ്യാഭ്യാസ മന്ത്രി വി ശിവൻകുട്ടി. ഇടിഞ്ഞാർ സർക്കാർ ട്രൈബൽ ഹൈസ്കൂളില്‍ . ഓരോ കുട്ടികൾക്കും അവരുടെ ആഗ്രഹങ്ങൾ എഴുതിയിടാൻ 'ആഗ്രഹപ്പെട്ടി' സ്ഥാപിച്ചിരുന്നു. അഞ്ചാം ക്ലാസില്‍ പഠിക്കുന്ന അസ്ന ഫാത്തിമ എസ് എസ് എന്ന കുട്ടി അരുമയായിരുന്ന തന്‍റെ ആടിനെ നഷ്ടപ്പെട്ടതിന്‍റെ വേദയാണ് ആഗ്രഹപ്പെട്ടിയില്‍ നിക്ഷേപിച്ച കത്തില്‍ എഴുതിയിരുന്നത്.



തന്‍റെ കുഞ്ഞാറ്റ എന്ന ആട്ടിൻകുട്ടിയെ വളരെ ഇഷ്ടമായിരുന്നുവെന്നും പിതാവിന്‍റെ ചികിത്സാ ആവശ്യത്തിനായി കുഞ്ഞാറ്റയെ വില്‍ക്കേണ്ടി വന്നുവെന്നും അസ്ന കത്തിലെഴുതി. ഒരു ആട്ടിൻകുട്ടിയെ വാങ്ങണമെന്നാണ് തന്‍റെ ആഗ്രഹമെന്നും അതിന് വാപ്പയുടെ കൈയില്‍ പൈസയില്ലെന്നും അസ്ന കുറിച്ചിരുന്നു. അസ്നമോളുടെ ഈ ആഗ്രഹം സാധ്യമാക്കിയ  സ്കൂളിലെ എല്ലാവരെയും മന്ത്രി വി ശിവൻകുട്ടി അഭിനന്ദിച്ചു.



ഓരോ കുട്ടികൾക്കും അവരുടെ ആഗ്രഹങ്ങൾ എഴുതിയിടാൻ 'ആഗ്രഹപ്പെട്ടി' എന്നത് കനിവാർന്ന ഒരു ആശയമാണെന്നും അദ്ദേഹം ഫേസ്ബുക്കില്‍ കുറിച്ചു. വ്യക്തിജീവിതത്തിലെ മോളുടെ നഷ്ടം നികത്താൻ ഒന്നിനും കഴിയില്ല എന്നറിയാം. ഞങ്ങൾ എല്ലാവരും മോളുടെ ഒപ്പം ഉണ്ട്. മോളുടെ അരുമയായി ആട് വളരെ എന്നും മന്ത്രി ഫേസ്ബുക്ക് പോസ്റ്റില്‍ പറഞ്ഞു.


അസ്നയുടെയും കത്തിന്‍റെയും ആഗ്രഹപ്പെട്ടിയുടെയും ആടിനെ അസ്നയ്ക്ക് സ്കൂളില്‍ വച്ച് കൈമാറുന്നതിന്‍റെയും ഉള്‍പ്പെടെ ചിത്രങ്ങള്‍ സഹിതമാണ് മന്ത്രി വി ശിവൻകുട്ടി ഫേസ്ബുക്ക് കുറിപ്പ് പങ്കുവെച്ചത്. സാമൂഹ്യ മാധ്യമങ്ങളില്‍ മന്ത്രിയുടെ കുറിപ്പ് വൈറല്‍ ആയിട്ടുണ്ട്. അഗ്രഹപ്പെട്ടി എന്ന  ഇടിഞ്ഞാർ സർക്കാർ ട്രൈബൽ ഹൈസ്കൂളിന്‍റെ ആശയം വളരെ മികച്ചതാണെന്നാണ് നിരവധി പേര്‍ പ്രതികരിക്കുന്നത്.  


Post a Comment

0 Comments