എടക്കാപറമ്പ് : അങ്ങാടിയുടെ മനോഹാരിതയാണ് ഇത്തവണ വരച്ചത്. ഒറ്റനോട്ടത്തിൽ ഫോട്ടോ എടുത്തതാണെന്ന് തോന്നിപ്പിക്കുന്ന തരത്തിൽ അതിസൂക്ഷ്മതയോടെയാണ് ഈ പെയിന്റിംഗ് ചെയ്തിരിക്കുന്നത്. എ ഫോർ വലിപ്പമുള്ള പേപ്പറിൽ മുപ്പത്തിയഞ്ച് മണിക്കൂറോളം സമയമെടുത്താണ് ഈ പെയിന്റിംഗ് ചെയ്തത്.
ചിത്രകലയ്ക്ക് പുറമേ കളിമൺ നിർമ്മിതികളിലും എം.വി.എസ് ശ്രദ്ധേയനാണ്.
കഴിഞ്ഞ കേരളപ്പിറവി ദിനത്തിൽ ഇദ്ദേഹം നിർമ്മിച്ച മുല്ലപ്പൂ ചൂടി നിൽക്കുന്ന അതീവ സുന്ദരിയായ മലയാളിമങ്കയുടെ കളിമൺ ശില്പം ഏറെ ജനശ്രദ്ധ നേടിയിരുന്നു.
മാമ്പഴം, ഭൂഗോളമേന്തിയ മാലാഖ, മാസ്ക് ധരിച്ച മഹാബലി, അധ്യാപിക, വിദ്യാർത്ഥിനി, സങ്കല്പവധു എന്നിവയാണ് ഇദ്ദേഹത്തിന്റെ ശ്രദ്ധേയമായ മറ്റു കളിമൺ ശില്പങ്ങൾ .
പരിമിതമായ ജീവിത സാഹചര്യങ്ങളിലും ചിത്ര-ശില്പ കലാരംഗത്ത് തന്റേതായ ഒരിടം കണ്ടെത്താൻ ഈ കലാകാരന് കഴിഞ്ഞു.
ചിത്രകലാധ്യാപകൻകൂടിയായ എം. വി.എസ് കണ്ണമംഗലം മേമാട്ടുപാറ സ്വദേശിയാണ്.
0 Comments