കണ്ണൂര്: എം.ബി.ബി.എസ് പഠിച്ചയാള് എം.ബി.ബി.എസ് ചികിത്സ മാത്രം നല്കിയാല് മതിയെന്ന നിയമസഭയിലെ പരാമര്ശത്തില് മാപ്പ് പറഞ്ഞ് എ.എന്.ഷംസീര് എം.എല്.എ. കഴിഞ്ഞ ദിവസം ഷംസീര് നിയമസഭയില് നടത്തിയ പ്രസംഗം സമൂഹ മാധ്യമങ്ങളിലടക്കം വൈറലായിരുന്നു. വ്യാജവൈദ്യത്തിനെതിരായുള്ള നിയമനിര്മാണ അവതരണ വേളയിലാണ് എം.എല്.എ ഡോക്ടര്മാര്ക്കെതിരെ ഇത്തരം പരമാര്ശം നടത്തിയത്. ഇതിനെതിരെ ഡോക്ടര്മാരില് നിന്നും ഐ.എം.എ ഭാരവാഹികളില് നിന്നുമടക്കം വിമര്ശനം ശക്തമായതിനെ തുടര്ന്നാണ് സംഭവത്തില് മാപ്പ് പറഞ്ഞുള്ള എം.എല്.എയുടെ വീഡിയോ സന്ദേശം പുറത്തുവന്നത്.
'ഹോസ്പിറ്റലിനകത്ത് എം.ബി.ബി.എസ് എന്ന പേര് വച്ചുകൊണ്ട് അവര് പീടിയാട്രിക്സ് ചികിത്സ നല്കുന്നു. അയാള് ഒബ്സ്ട്രടിക്സ് ആന്ഡ് ഗൈനക്കോളജി ചികിത്സ നടത്തുന്നു. അങ്ങനെയുള്ള കള്ള നാണയങ്ങളെ നമുക്ക് തിരിച്ചറിയാന് കഴിയണം....' തുടങ്ങിയ പരാമര്ശങ്ങളാണ് ഷംസീര് നടത്തിയത്.
എന്നാല്, താന് മനസില് കരുതാത്ത കാര്യമാണ് നാവില് നിന്ന് പുറത്തുവന്നതെന്നും എം.ബി.ബി.എസ് ഡോക്ടര്മാക്ക് അതുമൂലം ഉണ്ടായ ഉണ്ടാക്കിയ വേദനയില് ഞാന് മാപ്പു പറയുന്നുവെന്നും എം.എല്.എയുടെ വീഡിയോ സന്ദേശത്തില് സൂചിപ്പിക്കുന്നു. തന്റെ തെറ്റ് തിരിച്ചറിഞ്ഞു.
അപ്പോള് തന്നെ തന്റെ പരാമര്ശം നിയമസഭാ രേഖയില് നിന്ന് തിരുത്താന് അധികൃതര്ക്ക് കത്ത് നല്കി. എം.ബി.ബി.എസ് നേടിയ ചിലര് കേരളത്തില് ചില ഒറ്റപ്പെട ഇടങ്ങളില് പി.ജി ഉണ്ട് എന്ന രീതിയില് പ്രാക്ടീസ് ചെയ്യുന്നുണ്ട്. അതുമായി ബന്ധപ്പെട്ട് ചില കേസുകളും രജിസ്റ്റര് ചെയ്തിട്ടുണ്ട്. ഈ ഒരു പശ്ചാത്തലത്തില് ഇത്തരത്തിലുള്ളവരെ നിയന്ത്രിക്കണമെന്നാണ് താന് ഉദ്ദേശിച്ചത്. എന്നാല്, അവതരിപ്പിച്ചപ്പോള് നാക്കുപിഴ സംഭവിച്ചു -എം.എല്.എ പറഞ്ഞു.
0 Comments