കെ റെയിൽ എൽ.ഡി.എഫിന്റെ കണ്ഠകോടാലിയാകുമെന്നും തൃക്കാക്കരയിൽ വികസനം ചർച്ച ചെയ്യാൻ എൽ.ഡി.എഫിന് സാധിക്കില്ലെന്നും മുസ്ലിംലീഗ് ദേശീയ ജനറൽ സെക്രട്ടറി പി.കെ കുഞ്ഞാലിക്കുട്ടി പറഞ്ഞു. തൃക്കാക്കര ഉപതെരഞ്ഞെടുപ്പുമായി ബന്ധപ്പെട്ട് മാധ്യമങ്ങളുമായി സംസാരിക്കുകയായിരുന്നു അദ്ദേഹം. തെരഞ്ഞെടുപ്പിന് മുമ്പ് പാചകവാതക വിലയും പെട്രോളിയം ഉൽപന്നങ്ങളുടെ വിലയും കേന്ദ്രം പിടിച്ചു നിർത്തിയ മാതൃകയിലാണ് കേരളത്തിൽ കെ റെയിൽ കുറ്റിയിടൽ നിർത്തിവെച്ചത്. തെരഞ്ഞെടുപ്പ് കാലത്ത് വയ്യാവേലി ഒഴിവാക്കാനുള്ള തന്ത്രം മാത്രമാണിത്. കേരളത്തിന് ദഹിക്കാത്ത പദ്ധതിയാണ് കെ റെയിൽ. അതൊരു ജനകീയ തീരുമാനമല്ല. ഇത് തിരിച്ചറിയാൻ സർക്കാർ വൈകിപ്പോയി. -കുഞ്ഞാലിക്കുട്ടി പറഞ്ഞു.
വികസനം ചർച്ച ചെയ്യാനില്ലാത്തത് കൊണ്ടാണ് മറ്റു കാര്യങ്ങൾ തൃക്കാക്കരയിൽ ചർച്ച ചെയ്യുന്നത്. തൃക്കാക്കരയിലെ എല്ലാ വികസന നേട്ടങ്ങളും യു.ഡി.എഫിന്റെ കാലത്ത് കൊണ്ടുവന്നതാണ്. തങ്ങളുടെ കാലത്ത് കൊച്ചിയിൽ കൊണ്ടുവന്ന ഒരു വികസനവും ചൂണ്ടിക്കാട്ടാൻ എൽ.ഡി.എഫിനില്ല.- പി.കെ കുഞ്ഞാലിക്കുട്ടി പറഞ്ഞു. മുസ്ലിംലീഗ് സജീവമായി തെരഞ്ഞെടുപ്പ് പ്രചാരണ രംഗത്തുണ്ടാകുമെന്നും അദ്ദേഹം കൂട്ടിച്ചേർത്തു.
0 Comments