ബ്രസീലിന് കനത്ത തിരിച്ചടി;
നെയ്മർ അടുത്ത മത്സരത്തിൽ കളിക്കില്ല
ദോഹ: ഖത്തർ ലോകകപ്പില് സെർബിയക്കെതിരായ മത്സരത്തില് കാല്ക്കുഴയ്ക്ക് പരിക്കേറ്റ ബ്രസീലിയന് സൂപ്പർ താരം നെയ്മർക്ക് അടുത്ത മത്സരം നഷ്ടമാകും. 28-ാം തിയതി സ്വിറ്റ്സർലന്ഡിന് എതിരെയാണ് ബ്രസീലിന്റെ അടുത്ത കളി. ആദ്യ മത്സരത്തില് സെർബിയയെ എതിരില്ലാത്ത രണ്ട് ഗോളുകള്ക്ക് കാനറികള് തോല്പിച്ചിരുന്നു. ശക്തരായ സ്വിസ് ടീമിനെ തോല്പിച്ച് പ്രീക്വാർട്ടർ ഉറപ്പിക്കാനുള്ള ബ്രസീലിയന് മോഹങ്ങള്ക്കാണ് നെയ്മറുടെ പരിക്ക് തിരിച്ചടി നല്കുന്നത്. നെയ്മറുടെ സ്കാനിംഗ് റിപ്പോർട്ട് സംബന്ധിച്ചുള്ള വിശദ വിവരങ്ങള് പുറത്തുവന്നിട്ടില്ല.
യൂറോപ്യന് ഫിസിക്കല് ഗെയിമിന് പേരുകേട്ട സെര്ബിയക്കെതിരായ ബ്രസീലിന്റെ മത്സരം പൂര്ത്തിയാവാന് 11 മിനിറ്റ് ബാക്കിയിരിക്കെ പരിക്കേറ്റ കാലുമായി മുടന്തി നെയ്മര് വേദനയോടെ മൈതാനം വിടുകയായിരുന്നു. നെയ്മറുടെ കാല്ക്കുഴയില് നീര് വന്നിരിക്കുന്ന ചിത്രങ്ങള് പിന്നീട് പുറത്തുവന്നതോടെ ആരാധകർ ആശങ്കയിലായി. നെയ്മറുടെ കാലില് നീര്ക്കെട്ടുണ്ടെന്നും സ്കാനിംഗ് വേണ്ടിവരുമെന്നും ബ്രസീല് ടീം ഡോക്ടര് റോഡ്രിഗോ ലാസ്മാര് വ്യക്തമാക്കിയിരുന്നു. എന്നാല് സ്വിറ്റ്സർലന്ഡിനെതിരെ താരം കളിക്കും എന്ന പ്രതീക്ഷയാണ് സെർബിയക്കെതിരായ മത്സര ശേഷം ബ്രസീലിയന് പരിശീലകന് ടിറ്റെ പങ്കുവെച്ചത്.
0 Comments