വീട്ടിലെത്താനുള്ള ധൃതി; നിർത്തിയിട്ട ട്രെയിനിനടിയിലൂടെ കടന്ന വിദ്യാർഥിനിയെ മറ്റൊരു ട്രെയിനിടിച്ച് തെറിപ്പിച്ചു, കുട്ടിക്ക് ദാരുണാന്ത്യം
സ്കൂൾ വിട്ട് വീട്ടിലേക്ക് മടങ്ങിയ വിദ്യാർഥിനി ട്രെയിൻ തട്ടി മരിച്ചു. ബുധനാഴ്ച വൈകീട്ട് നാലര മണിയോടെയാണ് അപകടമുണ്ടായത്. മൃതദേഹം പോസ്റ്റ് മോർട്ടം നടപടികൾക്കായി ആശുപത്രിയിലേക്ക് മാറ്റി
കാസര്‍കോട്: പത്താം ക്ലാസ് വിദ്യാര്‍ഥിനി ട്രെയിന്‍ തട്ടി മരിച്ചു. കാഞ്ഞങ്ങാട് ദുര്‍ഗ ഹയര്‍ സെക്കണ്ടറി സ്കൂളിലെ വിദ്യാര്‍ഥിനി പവിത്ര (15) ആണ് മരിച്ചത്. ബുധനാഴ്ച വൈകിട്ട് നാലര മണിയോടെ സ്കൂൾ വിട്ട് വീട്ടിലേക്കു പോകും വഴിയാണ് അപകടമുണ്ടായത്.
കാഞ്ഞങ്ങാട് റെയിൽവേ സ്റ്റേഷനിൽ നിർത്തിയിട്ട ഗുഡ് ട്രെയിനിനടിയിൽ കൂടി പാളം മുറിച്ചു കടക്കവെ കണ്ണൂർ ഭാഗത്തു നിന്നു മംഗളുരു ഭാഗത്തേക്കു പോവുകയായിരുന്ന കോയമ്പത്തൂർ ഫാസ്റ്റ് പാസഞ്ചർ ട്രെയിൻ വിദ്യാർഥിനിയെ ഇടിക്കുകയായിരുന്നു. മൃതദേഹം ഹോസ്ദുർഗ് പോലീസ് എത്തി ഇൻക്വസ്റ്റ് നടപടിക്ക് ശേഷം പോസ്റ്റ്മോർട്ടത്തിനായി കാഞ്ഞങ്ങാട് ജില്ലാ ആശുപത്രിയിലേക്ക് മാറ്റി.
എന്നും സ്കൂളിൽ വിട്ടു പഴയ കൈലാസ് തിയേറ്ററിന് സമീപത്തുള്ള എകെജി ക്ലബ്ബ് റോഡ് വഴിയാണ് വീട്ടിലേക്ക് പോവുക. എന്നാൽ വഴി മധ്യേ ഗുഡ്സ് ട്രെയിൻ നിർത്തിയിട്ടിരിക്കുകയായിരുന്നു. അടിയിലൂടെ നുഴഞ്ഞു ഇറങ്ങി അടുത്ത പാളം മുറിച്ചു കടക്ക് മുമ്പ് തന്നെ ട്രെയിൻ എത്തിയിരുന്നു.
പരേതയായ കാർത്തിക, മുരുകൻ ദമ്പതികളുടെ മകളാണ്. കുമളി കമ്പം സ്വദേശികളാണ് ഇവർ 35 വർഷമായി കാഞ്ഞങ്ങാട്ടുകാരാണ്. ചെറുപ്പം മുതലേ മാതാപിതാക്കളെ നഷ്ടപ്പെട്ട പെൺകുട്ടി മാതൃപിതാവ് രാമപ്പയുടെ സംരക്ഷണയിലാണ് കഴിഞ്ഞിരുന്നത്. കാഞ്ഞങ്ങാട് റെയിൽവേ സ്റ്റേഷനിൽ പടിഞ്ഞാറുഭാഗത്ത് വാടക ക്വാട്ടേഴ്സിലാണ് കുടുംബം താമസിച്ചുവരുന്നത്. പത്താം ക്ലാസ് മോഡൽ പരീക്ഷയ്ക്കുള്ള തയ്യാറെടുപ്പിനിടെയാണ് അപകടം പവിത്രയുടെ ജീവൻ കവർന്നത്.
0 Comments