റിയാദ്: റിയാദിൽ ഏഴു പേരെ ഇന്ന് ചൊവ്വാഴ്ച വധശിക്ഷക്ക് വിധേയരാക്കിയതായി സഊദി ആഭ്യന്തരമന്ത്രാലയം അറിയിച്ചു. പ്രതികൾ ഏഴുപേരും സഊദി പൗരന്മാരാണ്. കഴിഞ്ഞ നാലു വർഷങ്ങൾക്കുള്ളിൽ വിവിധ ഘട്ടങ്ങളിലായി അറസ്റ്റ് ചെയ്‌ത പ്രതികളെയാണ് വധശിക്ഷക്ക് വിധേയരാക്കിയത്.
അഹമ്മദ് ബിൻ സൗദ് ബിൻ സഗീർ അൽ- ഷമ്മരി, സഈദ് ബിൻ അലി ബിൻ സഈദ് അൽ-വദായി, അബ്‌ദുൽ അസീസ് ബിൻ ഉബൈദ് ബിൻ അബ്‌ദുല്ല അൽ-ഷഹ്റാനി, അവദ് ബിൻ മുഷബാബ് ബിൻ സഈദ് അൽ- അസ്മരി, അബ്‌ദുല്ല ബിൻ ഹമദ് ബിൻ മജൂൽ അൽ-സഈദി, മുഹമ്മദ് ബിൻ ഹദ്ദാദ് ബിൻ അഹമ്മദ് ബിൻ മുഹമ്മദ്, അബ്‌ദുല്ല ബിൻ ഹാജസ് ബിൻ ഗാസി അൽ-ഷമ്മരി എന്നിവരെയാണ് വധശിക്ഷക്ക് വിധേയരാക്കിയത്.
പ്രതികൾ മാതൃ രാജ്യത്തെ ഒറ്റിക്കൊടുക്കുന്നതും അതിന്റെ സ്ഥിരതയെ ഭീഷണിപ്പെടുത്തുന്നതും സുരക്ഷയെ അപകടപ്പെടുത്തുന്നതും ഉൾപ്പെടുന്ന ക്രിമിനൽ പ്രവൃത്തികൾ ചെയ്യുകയും സമൂഹത്തിന്റെ സുരക്ഷിതത്വവും സുസ്ഥിരതയും തകർക്കുക, ദേശീയ ഐക്യം അപകടപ്പെടുത്തുക എന്ന ലക്ഷ്യത്തോടെ, രക്തച്ചൊരിച്ചിലിനും, തീവ്രവാദ സംഘടനകളെയും സ്ഥാപനങ്ങളെയും സൃഷ്‌ടിക്കുകയും ധനസഹായം നൽകുകയും അവരുമായി ആശയവിനിമയം നടത്തുകയും ഇടപെടുകയും ചെയ്യുന്ന തീവ്രവാദ സമീപനം പുലർത്തുകയും ചെയ്‌തിരുന്നുവെന്ന് അധികൃതർ വ്യക്തമാക്കി.
പബ്ലിക് പ്രോസിക്യൂഷന്റെ അന്വേഷണത്തിനൊടുവിൽ അവരിൽ ഓരോരുത്തരും ഈ ക്രിമിനൽ പ്രവൃത്തികൾ ചെയ്ത‌തിന് കുറ്റം ചുമത്തി, അവരെ പ്രത്യേക ക്രിമിനൽ കോടതിയിലേക്ക് റഫർ ചെയ്തുകൊണ്ട്, അവർക്കെതിരെ ചുമത്തിയ കുറ്റം തെളിയിക്കുന്ന വിധികൾ പുറപ്പെടുവിക്കുകയും വധശിക്ഷയ്ക്ക് വിധിക്കുകയും ചെയ്തു. കൂടാതെ ഈ വിധികൾ പ്രത്യേക അപ്പീൽ കോടതിയും സുപ്രീം കോടതിയും ശരി വെക്കുകയും ചെയ്തു. തുടർന്ന്, ഇന്ന് ചൊവ്വാഴ്ച പ്രതികളെ റിയാദിൽ വധശിക്ഷക്ക് വിധേയരാക്കുകയായിരുന്നു.
0 Comments